"இடுக்கமான வாயில் வழியாக நுழைய வருந்தி முயலுங்கள். லூக்கா நற்செய்தி 13:24

( "இடுக்கமான வாயில் வழியாக நுழைய வருந்தி முயலுங்கள். 

லூக்கா நற்செய்தி 13:24)

எல்லா விதமான வாழ்க்கை வசதிகளும் உள்ள ஒரு குறிப்பிட்ட கட்டிடத்திற்குள் செல்லத் தீர்மானித்து வந்து கட்டிடத்தின் முன் நிற்கிறோம்.

ஆனால் அதன் வாயில் நாம் வந்த வேகத்தில் உள்ளே நுழைவது மாதிரி இல்லை.

நமது உடலின் உயர அகல அளவுக்கு வாயில் இல்லை.

பக்கவாட்டில் திரும்பி உடலின் இரு பக்கங்களும் நிலைக்கம்பில் உரசும்படி நெளிந்து வளைந்து,

அதனால் ஏற்படும் உடல் வலியைத் தாங்கிக் கொண்டுதான் உள்ளே செல்ல முடியும்.

பக்கத்தில் ஒரு கட்டிடம் இருக்கிறது.

அதன் உள்ளே எந்த விதமான வாழ்க்கை வசதியும் இல்லை.

உட்கார ஒரு பலகை கூட இல்லை.

ஆனால் வாயில் அகலமாக கவர்ச்சிகரமாக உள்ளது.

நடனமாடிக்கொண்டே உள்ளே செல்லலாம்.

குறுகிய வாயில் உள்ள வீடு வசதிகள் நிறைந்த வீடு.

அகலமான வாசல் உள்ள வீடு எந்த வசதியும் இல்லாதது.

கஷ்டப்பட்டாலும் பரவாயில்லை வசதிகள் உள்ள வீடுதான் வேண்டும் என்று குறுகிய வாயில் வழியாக உள்ளே நுழைவீர்களா?

வாழ்க்கை வசதிகள் எதுவும் தேவையில்லை, ஜாலியாக நுழைந்தால் போதும் என்று அகலமான வாயில் வழியே நுழைவீர்களா?

ஒன்றுமில்லாமல் இருந்த நாம் கடவுளால் உருப்பெற்று உலகில் நுழைந்தோம்.

எதற்காக?

வாழ்வதற்காக.

எப்படி வாழ்வதற்காக?

நாம் தேர்வு செய்வதற்காக நம்முன் இரண்டு நோக்கங்கள் வைக்கப் பட்டிருக்கின்றன.

1. நித்திய பேரின்ப வாழ்வு.

2. நித்திய பேரிடர் வாழ்வு.

இந்த இரண்டு நோக்கங்களில் எதாவது ஒன்றை நோக்கி பயணிக்க வேண்டும்.

நாம் தேர்வு செய்யும் நோக்கத்திற்கு ஏற்ப நமது உலக வாழ்க்கை முறை இருக்கும்.

நமது இவ்வுலக வாழ்வின் இறுதியில் தான் நமது நோக்கத்தை அடைய முடியும்.

நித்திய பேரின்ப வாழ்வைத் தேர்வு செய்வோர் வாழ்க்கை முறை எப்படி இருக்க வேண்டும்?

நித்திய பேரின்ப வாழ்வென்னும் வீட்டின் வாயில் மிகவும் இடுக்கமானது.

அங்கு செல்லும் வழியும் முட்கள் நிறைந்த ஒற்றையடிப் பாதையைப் போன்றது.

விண்ணகம் செல்லும் ஆன்மீக வழியில் நடப்போர் தங்கள் விருப்பப்படி நடக்க முடியாது.

கடவுளின் கட்டளைகளுக்குக் கட்டுப்பட்டு இயேசு வகுத்துக் கொடுத்த ஒழுக்க நெறிகளின் படி நடக்க வேண்டும்.

உடலை ஒறுத்து நடக்க வேண்டும்.

எவ்வளவு பெரிய துன்பம் வந்தாலும் அதை இன்பமாக ஏற்று மகிழ்ச்சியுடன் நடக்க வேண்டும்.

சிலுவைக்குப் பின்புதான் உயிர்ப்பு, இது இயேசு காட்டிய வழி.

சிலுவைப் பாதை தான் மீட்பின் பாதை.

இயேசுவோடு பேரின்ப வீட்டில் வாழ விரும்புகிறவர்கள் சிலுவையைச் சுமந்து தான் ஆக வேண்டும்.

சிலுவை கனமாக இருக்குமே!

கனமானதாகத்தான் இருக்கும்.‌ ஆனால் விண்ணகத்தில் அனுபவிக்கவிருக்கும் பேரின்பத்தோடு ஒப்பிட்டுப் பார்க்கும்போது சிலுவையின் கனம் இலேசாக இருக்கும்.

சிலுவை வாழ்வு தற்காலிகமானது,

பேரின்ப வாழ்வு நிரந்தரமானது.

நித்திய பேரிடர் வாழ்வை நோக்கமாகக் கொண்டவர்கள் எப்படி வாழ வேண்டும்?

வேண்டும் என்ற பேச்சுக்கே இடமில்லை.

எப்படி வேண்டுமானாலும் வாழலாம்.

கட்டளைகளை மீறலாம்.

சிற்றின்பத்தில் மிதக்கலாம்.

பேரிடர் வாழ்வு வீட்டுக்கான பாதையும் அகலமானது, வாயிலும் அகலமானது.

அனுபவிக்கவிருக்கும் பேரிடரும் மிகுதியானது.

சிற்றின்ப வாழ்வு தற்காலிகமானது, பேரிடர் நிரந்தரமானது.

பேரின்ப வாழ்வைத் தேர்ந்தெடுப்போம்.

இடுக்கமான வாயில் வழியாக நுழைய வருந்தி முயல்வோம்.

லூர்து செல்வம்.