மண்ணுலகில் அமைதியை ஏற்படுத்த வந்தேன் என்றா நினைக்கிறீர்கள்? இல்லை, பிளவு உண்டாக்கவே வந்தேன் என உங்களுக்குச் சொல்கிறேன். (லூக்கா நற்செய்தி 12:51)

மண்ணுலகில் அமைதியை ஏற்படுத்த வந்தேன் என்றா நினைக்கிறீர்கள்? இல்லை, பிளவு உண்டாக்கவே வந்தேன் என உங்களுக்குச் சொல்கிறேன். 

(லூக்கா நற்செய்தி 12:51)

சமாதானம் X பிளவு, 

எதிர்ப் பதங்கள்.

எப்படி ஒளி இருக்கும் இடத்தில் இருட்டு இருக்க முடியாதோ

அவ்வாறே 

சமாதானம் இருக்கும் இடத்தில் பிளவு இருக்க முடியாது.

இயேசு சமாதானத்தின் தேவன்.

பரிசுத்த தம திரித்துவத்தின் முக்கியமான பண்பு சமாதானம்,

மூன்று ஆட்களும் , ஒருவருள் ஒருவராய் ஒன்றித்து, ஒரே கடவுளாக வாழ்கிறார்கள்.

மூவொரு கடவுள்.

கடவுள் மனிதர்களைத் தன் சாயலில் படைத்தார்.

தனது சமாதானத்தையும் அவர்களோடு பகிர்ந்து கொண்டார்.

பாவம் அற்ற நிலையில் தன்னோடும், அவர்கள் ஒருவரோடொருவரும் சமாதானத்தோடு வாழும் நிலையில் படைத்தார்.

ஆனால் மனிதர்கள் பாவத்தினால் தங்கள் சமாதான நிலையை இழந்தார்கள்.

ஆனால் கடவுள் மாறாதவர்.

சமாதானம் அவரது இயல்பு.

மனிதர்கள் இழந்த சமாதானத்தை மீட்டுக் கொடுப்பதற்காக மனிதனாகப் பிறந்தார்.

இறைமகன் மனுமகனாகப் பிறந்தது மனிதர்களைச் சமாதான உறவோடு வாழ வைப்பதற்காக.

அதனால் தான் அவர் பிறந்த அன்று வான தூதர்கள்,

"பூவுலகில் நல்மனதோர்க்கு சமாதானம் உண்டாகுக" என்று பாடினார்கள்.

நல்ல மனதினர் என்றால் பாவம் இல்லாத மனதினர்.

இயேசு பிறந்ததன் நோக்கமே மனிதர்களின் பாவங்களை மன்னித்து அவர்களைச் சமாதானமாக வாழ வைப்பதுதான்.

மண்ணுலகில் சமாதானத்தை ஏற்படுத்தவே இயேசு வந்தார்.

அப்படியானால் இயேசு

"மண்ணுலகில் சமாதானத்தை ஏற்படுத்த வந்தேன் என்றா நினைக்கிறீர்கள்? இல்லை, பிளவு உண்டாக்கவே வந்தேன் என உங்களுக்குச் சொல்கிறேன்." ‌என்று ஏன் சொல்கிறார்?

ஒரு‌ குடும்பத்தில் உள்ள பத்து பேருக்கும் கொரோனாக் காய்சல் என்று வைத்துக் கொள்வோம்.

காய்ச்சல் விடயத்தில் ஒன்று போல் இருக்கிறார்கள்.

மருத்துவர் வந்து அவர்கள் குணமடையத் தேவையான மாத்திரைகளைக் குடும்பத் தலைவரிடம் கொடுத்துவிட்டுப் போகிறார்.

ஐந்து நாட்கள் கழித்து வந்து பார்க்கிறார்.

ஐவருக்குக் காய்ச்சல் குணமாகி விட்டது.

மருந்தைச் சரியாகச் சாப்பிடாததால் ஐவருக்குக் காய்ச்சல் நீடிக்கிறது.

பக்கத்து வீட்டுக்காரர் மருத்துவரிடம்,

"என்ன காரியமாக அந்த வீட்டுக்குச் சென்றீர்கள்?"

என்று கேட்கிறார்.

''ஒற்றுமையாக இருந்த குடும்பத்தைப் பிரித்து விடச் சென்றேன்."

"புரியவில்லை."

"நான் போகுமுன் காய்ச்சல் விடயத்தில் ஒற்றுமையாக இருந்தார்கள்.

இப்போது ஐவர் ஐவராகப் பிரிந்து விட்டார்கள்.

சுகமாக ஐவர், சுகமில்லாமல் ஐவர்."

"ஏன்?"

"மாத்திரைகளை ஒழுங்காகச்  சாப்பிட்ட ஐவர் குணமானார்கள்.

ஒழுங்காகச் சாப்பிடாத ஐவர் குணம் பெறவில்லை."

குழந்தை இயேசுவை ஆண்டவருக்கு அர்ப்பணிக்க‌ அன்னை மரியாளும், சூசையப்பரும் கோவிலுக்குச் சென்றபோது, 

சிமியோன் அவர்களுக்கு ஆசிகூறி, 

அதன் தாயாகிய மரியாவை நோக்கி, 

"இதோ, இக்குழந்தை இஸ்ரயேல் மக்களுள் பலரின் வீழ்ச்சிக்கும் எழுச்சிக்கும் காரணமாக இருக்கும்; எதிர்க்கப்படும் அடையாளமாகவும் இருக்கும்."

(லூக்கா நற்செய்தி 2:34)

என்றார்.

இயேசு உலகுக்கு வந்தது மக்களின் எழுச்சிக்காகத்தான்,

வீழ்ச்சிக்காக அல்ல.

ஆனால் இயேசு வருமுன் பாவத்தினால் மக்கள் அனைவரும் வீழ்ந்து கிடந்தனர்.

இயேசு வந்தபின் அவரை ஏற்றுக் கொண்டவர்கள் எழுந்தனர், ஏற்றுக் கொள்ளாதவர்கள் வீழ்ந்தே கிடந்தனர்.

அன்று சிமியோன் சொன்னதைத்தான் இன்று இயேசு வேறு வார்த்தைகளில் சொல்கிறார்.

இயேசுவின் வருகைக்கு முன்னர் மனித குலமே சமாதானம் இல்லாத நிலையில் இருந்தது.

இயேசு தனது பாடுகளாலும், மரணத்தாலும் அதை மீட்டபின் இயேசுவின் நற்செய்தியை ஏற்றுக் கொண்டு அதன் படி வாழ்ந்தவர்கள் மீட்பின் பயனை அடைந்தார்கள்,

அதாவது, இறைவனோடு சமாதானம் அடைந்தார்கள்,

அதன்படி வாழாதவர்கள் பிளவு நிலையிலேயே இருக்கிறார்கள்.

இயேசு சமாதானத்தை ஏற்படுத்தினார்.

பிளவுக்கு அவர் பொறுபல்ல.

 இயேசுவின் சிலுவை மரணம், பாவத்திற்கும் தூய்மைக்கும் இடையே ஒரு பெரிய பிளவை உருவாக்கியது.

 அது மனிதர்களை இரண்டு பிரிவுகளாக பிரித்தது.

 இயேசுவை நம்புபவர்கள் மற்றும் நம்பாதவர்கள்.

இயேசுவை பின்பற்றுவது என்பது எளிதான பாதை அல்ல.

லௌகீக வாழ்க்கையிலிருந்து பிரிந்து வந்தால்தான் இயேசுவின் போதனைப்படி வாழ முடியும்.

ஆன்மீக வாழ்வுக்கும் லௌகீக வாழ்வுக்கும் இடையில் பிளவு ஏற்படுவதைத் தவிர்க்க முடியாது.

ஆன்மீக வாழ்வையும் லௌகீக வாழ்வையும் சேர்த்து வாழ முடியாது.

நாம் லௌகீக வாழ்வு வாழ்ந்து கொண்டிருந்தால் அதை முற்றிலும் துறந்து விட்டு ஆன்மீக வாழ்வு வாழ ஆரம்பிப்போம்.

லௌகீக வாழ்க்கையிலிருந்து நம்மைப் பிரித்துத் தன்னோடு சேர்த்துக் கொள்ளவே இயேசு உலகுக்கு வந்தார்.

உலகிலிருந்து பிரிவோம்.

இயேசுவோடு இணைவோம்.

லூர்து செல்வம்.