அவர்கள் அவரை நோக்கி, நீர் அரியணையில் இருக்கும் போது எங்களுள் ஒருவர் உமது வலப்புறமும் இன்னொருவர் உமது இடப்புறமும் அமர்ந்து கொள்ள எங்களுக்கு அருளும்" என்று வேண்டினர். (மாற்கு நற்செய்தி 10:37)

அவர்கள் அவரை நோக்கி, நீர் அரியணையில் இருக்கும் போது எங்களுள் ஒருவர் உமது வலப்புறமும் இன்னொருவர் உமது இடப்புறமும் அமர்ந்து கொள்ள எங்களுக்கு அருளும்" என்று வேண்டினர். 

(மாற்கு நற்செய்தி 10:37)

இயேசுவின் சீடர்கள் இயேசுவை மெசியாவாக ஏற்றுக் கொண்டார்கள்,

 ஆனால் அவர்களில் 

 தவறான பொருளில் ஏற்றுக் கொண்டவர்களும். இருந்தார்கள்.

யூதர்களை அடிமைத் தனத்திலிருந்து மீட்பார் என்பது அவர்களின் நம்பிக்கை.

நம்பிக்கையில் தவறில்லை, இயேசு மக்களை அடிமைத் தனத்திலிருந்து மீட்கத்தான் பிறந்தார்.

ஆனால்... என்ன ஆனால்?

உணவு உண்பவனுக்கு வளர்ச்சியைக் கொடுக்கும், உண்மை.

ஆனால் இன்றைய காலக்கட்டத்தில் உணவு என்ற பெயரில் விற்கப்படுபவைதான் நமது அநேக நோய்களுக்குக் காரணம் என்று மருத்துவர்கள் கூறுகின்றனர்.

உணவு என்ற வார்த்தையின் உண்மையான பொருளைப் புரிந்து கொள்ளாததன் விளைவுதான் நோய்கள்.

அவ்வாறு தான் அடிமைத்தனம் என்ற வார்த்தையின் சரியான பொருளைப் புரிந்து கொள்ளாததன் விளைவுதான் இயேசுவை மக்கள் சரியாகப் புரிந்து கொள்ளாதது.

இயேசு மக்களை அடிமைத் தனத்திலிருந்து மீட்கத்தான் பிறந்தார்.

ஆனால் எந்த அடிமைத்தனம்?

ஆன்மீக அடிமைத்தனம்,

பாவத்தின் அடிமைத்தனம்.

நமது முதல் பெற்றோர் சாத்தானின் சூழ்ச்சியால் பாவத்துக்கு அடிமைகள் ஆனார்கள்.

பாவத்தின் அடிமைத் தனத்திலிருந்து,

அதாவது, 

சாத்தானின் அடிமைத் தனத்திலிருந்து

மனிதரை (யூதர்களை மட்டுமல்ல) மீட்கவே இறைமகன் மனுவுரு எடுத்தார்.

ஆனால்,

அது யூதர்கள் வேற்று நாட்டவர்களால் ஆளப்பட்டு வந்த காலம்.

ஆகவே யூதர்களை அடிமைத் தனத்திலிருந்து மீட்க மெசியா வருவார் என்ற‌ தீர்க்கத் தரிசனத்தை அவர்கள் தவறாகப் புரிந்து கொண்டார்கள்.

அரசியல் அடிமைத் தனத்திலிருந்து மீட்க வருவார் என்று தவறாகப் புரிந்து கொண்டார்கள்.

இயேசுவின் காலத்தில் ரோமையர்கள் யூதர்களை ஆண்டு வந்தார்கள்.

இயேசு ரோமையர்களின் அடிமைத் தனத்திலிருந்து யூதர்களை மீட்டு தனி அரசு அமைத்து அரசாள்வார் என்று அவருடைய சீடர்கள் கூட எண்ணிக் கொண்டிருந்தார்கள்.

அதன் விளைவு தான்

"நீர் அரியணையில் இருக்கும் போது எங்களுள் ஒருவர் உமது வலப்புறமும் இன்னொருவர் உமது இடப்புறமும் அமர்ந்து கொள்ள எங்களுக்கு அருளும்"

என்ற யாக்கோபு யோவான் ஆகியோருடைய வேண்டுகோள்.

இயேசு உண்மையைப் புரிய வைப்பதற்காக அவர்களிடம், "நீங்கள் என்ன கேட்கிறீர்கள் என உங்களுக்குத் தெரியவில்லை. நான் குடிக்கும் துன்பக் கிண்ணத்தில் உங்களால் குடிக்க இயலுமா? நான் பெறும் திருமுழுக்கை உஙகளால் பெற இயலுமா?" என்று கேட்டார். 

அவர்கள் ''இயலும்" என்று சொன்னாலும் உண்மையைப் புரிந்து சொன்னார்களா என்று தெரியவில்லை.

பாடுகளின் போது யோவானைத் தவிர மற்ற அனைவரும் அவரை விட்டு ஓடி விட்டார்கள்.

"அப்பொழுது சீடர் அனைவரும் அவரை விட்டுவிட்டுத் தப்பி ஓடினர்."

(மாற்கு நற்செய்தி 14:50)

அதுமட்டுமல்ல, " மரித்த மூன்றாம் நாள் உயிர்ப்பேன்" என்று அவர் அவர்களிடம் கூறியிருந்தும் அவர் உயிர்ப்பார் 

என்று யாரும் நம்பவில்லை.

மாறாக யூதர்களுக்குப் பயந்து ஒரு வீட்டில் ஒழிந்து கொண்டார்கள்.

மூன்று ஆண்டுகள் இயேசுவிடம் பயிற்சி பெற்றிருந்தும் அவர்களுக்கு உறுதியான விசுவாசம் ஏற்படவில்லை.

தூய ஆவியின் வருகைக்குப் பிறகுதான் அவர்களுடைய விசுவாசம் உறுதியடைந்தது.

நமது விசுவாசம் எப்படி இருக்கிறது?

நமக்கு மெசியா யார்?

நாமும் யோவானையும் யாக்கோபையும் மாதிரி தான் நடந்து கொள்கிறோமா?

நாம் பைபிள் வசனங்களை வாசிப்பது வசனங்களை மையமாக வைத்து நம்மைப் பற்றித் தியானிப்பதற்காக.

அவர்கள் இருவரும் இயேசுவை அரசியல் விடுதலை வீரராக எண்ணி அவருடைய அரசில் உயர்ந்த பதவி கேட்டார்கள்.

நாம் தினமும் இயேசுவை நோக்கி செபிக்கிறோம், வீட்டிலும், கோவிலிலும்.

அடிக்கடி திவ்ய நற்கருணை நாதரைச் சந்தித்து செபிக்கிறோம்.

திருப்பலிக்கு வரும்போது நாமும் செபிக்கிறோம், பூசைக்கருத்து கொடுத்து குருவானவரையும் நமக்காக செபிக்கச் சொல்கிறோம்.

பாவத்திலிருந்து விடுதலை பெற செபிக்கிறோமா?

உலகத் துன்பங்களிலிருந்து விடுதலை பெற செபிக்கிறோமா?

ஆன்மீக நன்மைகளுக்காக செபிக்கிறோமா?

உடல் சார்ந்த நன்மைகளுக்காக செபிக்கிறோமா?

தேர்வில் வெற்றி பெற, வேலை கிடைக்க, சம்பள உயர்வு கிடைக்க, கடன் தொல்லைகள் முடிவுக்கு வர, திருமணம் நடக்க, குழந்தை பிறக்க.... போன்றவை உடல் சார்ந்த நன்மைகள்.

பாவ மன்னிப்புப் பெற, பரிசுத்தத்தனத்தில் வளர, தூய ஆவியின் வரங்களுக்காக, விசுவாசம்  நம்பிக்கை இறையன்பு ஆகிய புண்ணியங்களில் வளர..... போன்றவை ஆன்மா சார்ந்த நன்மைகள்.

நமது செபத்தில் எந்த நன்மைகளுக்கு முக்கியத்துவம் கொடுக்கிறோம்?

உடல் சார்ந்த நன்மைகள் இவ்வுலகில் மகிழ்ச்சியைக் கொடுக்கும்.

ஆன்மா சார்ந்த நன்மைகள் நித்திய பேரின்ப வாழ்வை ஈட்டும்.

இயேசு உலகுக்கு வந்தது நமது இவ்வுலக வாழ்வை மகிழ்ச்சிப் படுத்தவா?

அல்லது 

நம்மை‌ நித்திய பேரின்ப வாழ்வுக்கு அழைத்துச் செல்லவா?

துன்பங்கள் வந்தால் அவற்றிலிருந்து விடுதலை பெற வேண்டுகிறோமா?

அல்லது 

அவற்றை ஏற்று நமது பாவங்களுக்குப் பரிகாரமாக ஒப்புக் கொடுக்கிறோமா?

சிந்தித்துப் பார்ப்போம்.

நாம் பிறந்தது இவ்வுலகில் நிரந்தரமாக வாழ்வதற்காக அல்ல.

விண்ணகத்தில் நிரந்தரமாக வாழ்வதற்காக.

ஆன்மீக நலன்களுக்காக வேண்டுவோம்,

இவ்வுலக நன்மைகள் நாம் கேட்காமலேயே கிடைக்கும்.

"ஆகவே அனைத்திற்கும் மேலாக அவரது ஆட்சியையும் அவருக்கு ஏற்புடையவற்றையும் நாடுங்கள். அப்போது இவையனைத்தும் உங்களுக்குச் சேர்த்துக் கொடுக்கப்படும்."

(மத்தேயு நற்செய்தி 6:33)

ஆண்டவர் சொன்ன சொல்லைக் காப்பாற்றுவார்.

லூர்து செல்வம்.