நீங்கள் உங்கள் எதிரியோடு ஆட்சியாளரிடம் போகும்போது, வழியிலேயே உங்கள் வழக்கைத் தீர்த்துக் கொள்ள முயற்சி செய்யுங்கள். இல்லையேல் அவர் உங்களை நடுவரிடம் இழுத்துக்கொண்டு போக, நடுவர் உங்களை நீதிமன்ற அலுவலரிடம் ஒப்புவிப்பார்; நீதிமன்ற அலுவலர் உங்களைச் சிறையிலடைப்பார். (லூக்கா நற்செய்தி 12:58)

நீங்கள் உங்கள் எதிரியோடு ஆட்சியாளரிடம் போகும்போது, வழியிலேயே உங்கள் வழக்கைத் தீர்த்துக் கொள்ள முயற்சி செய்யுங்கள். இல்லையேல் அவர் உங்களை நடுவரிடம் இழுத்துக்கொண்டு போக, நடுவர் உங்களை நீதிமன்ற அலுவலரிடம் ஒப்புவிப்பார்; நீதிமன்ற அலுவலர் உங்களைச் சிறையிலடைப்பார். 

(லூக்கா நற்செய்தி 12:58)

இவ்வுலகில் நாம் இருப்பதன் நோக்கம் சமாதான வாழ்வு.

நாம் தனிப் பிறவி அல்ல, சமூகப்  பிறவி.

கடவுள் மனிதனைக் குடும்பமாகப் படைத்தார்.

குடும்பம் ஒரு சிறிய சமூகம், குறைந்த பட்சம் கணவன் மனைவி இருவர் இருப்பர்.

ஆதாம் ஏவாள் ஆகிய ஒரு சிறிய சமூகத்திலிருந்து தான் மனுக்குலமாகிய பெரிய சமூகம் பிறந்தது.

ஒரே கடவுள் மூன்று ஆட்களாக இருக்கிறார்.

பரிசுத்த தம திரித்துவத்தின் முக்கிய பண்புகளில் ஒன்று சமாதானம்.

மூவருக்கும் ஒரே சித்தம், ஒரே ஞானம்,  ஒரே தேவ சுபாவம்.

நாம் கடவுளின் சாயலில் படைக்கப்பட்டிருக்கிறோம்.

கடவுளின் சாயலில் படைக்கப்பட்ட மனிதர்களாகிய நாம் சமாதானமாக வாழ வேண்டுமானால் ஒருவரை ஒருவர் புரிந்து கொண்டு, 

ஒருவரை ஒருவர் ஏற்றுக் கொண்டு 

ஒற்றுமையுடன், அதாவது, சமாதானமாக வாழ வேண்டும்.

எதிர் எதிர்ப் பண்புகளை உடைய இருவர் ஒரு குடும்பமாக இணையும் போது கருத்து வேறுபாடுகள் காரணமாக குடும்ப சமாதானத்திற்குப் பங்கம் ஏற்படும்.

அவர்கள் வாழ்நாள் முழுவதும் சமாதானம் இல்லாமல் சண்டை போட்டுக் கொண்டே வாழ்ந்தால் 

வாழ்வின் இறுதியில் நடுவராக வரும் கடவுள் முன்னிலையில் எப்படிக் கணக்குக் கொடுப்பார்கள்?

விளைவுகளைச் சந்திக்க நேரிடும்.

அதனால் தான் நமது ஆண்டவர்

"வழியிலேயே உங்கள் வழக்கைத் தீர்த்துக் கொள்ள முயற்சி செய்யுங்கள்."

என்று சொல்கிறார்.

வாழும்போதே ஒருவரை ஒருவர் புரிந்து கொண்டு, ஏற்றுக் கொண்டு வாழ்ந்தால் 

இறக்கும்போது சமாதானமாக இறப்பார்கள்.

சமாதானத்தின் தேவன் அவர்களின் சமாதான வாழ்வுக்குப் பரிசாக நித்திய பேரின்ப வாழ்வைக் கொடுப்பார்.

கடவுள் ஒருவர். மூன்று ஆட்களுக்குள்ளும் கருத்து வேறுபாடு என்ற பேச்சுக்கே இடமில்லை.

ஏனெனில் மூவருக்கும் ஒரே சித்தம்.

ஆனால் மனிதர்கள் ஒவ்வொருவரும் தனித்துவமானவர்கள்.

Each and every human person is unique.

மனிதனர்களுள் கருத்து வேறுபாடுகள் இருப்பது இயல்பு.

கருத்துவேறுபாடுகள் உள்ள மனிதர்கள் எப்படி இறைவனின் சாயலில் சமாதானமாக வாழ முடியும்?

ஆனால் இயேசுவின் எதிர்பார்ப்பு அதுதான்.

"ஆதலால், உங்கள் விண்ணகத் தந்தை நிறைவுள்ளவராய் இருப்பது போல நீங்களும் நிறைவுள்ளவர்களாய் இருங்கள் "

(மத்தேயு நற்செய்தி 5:48)

என்று ஆண்டவரே கூறியிருக்கிறார்.

தந்தையைப் போல் இருந்தால் தம திரித்துவத்தைப் போல்தான் இருப்போம்.

இயேசுவின் ஆசையை எப்படி நிறைவேற்றுவது?

நமக்குள் கருத்து வேறுபாடுகள் இருந்தாலும் ஒருவரை ஒருவர் அன்புடன் ஏற்றுக் கொண்டு வாழலாமே.

அன்பு பொறுமையுள்ளது; நன்மை செய்யும்; பொறாமைப்படாது; 

தற்புகழ்ச்சி கொள்ளாது; இறுமாப்பு அடையாது. 

அன்பு அனைத்தையும் பொறுத்துக் கொள்ளும்; அனைத்தையும் நம்பும்; அனைத்தையும் எதிர்நோக்கி இருக்கும்.

(1 கொரிந்தியர் 13:6,7)

இத்தகைய அன்பு உள்ளவர்கள் எந்த சூழ்நிலையிலும் ஒருவரை ஒருவர் புரிந்து கொண்டு, ஏற்றுக் கொண்டு வாழ்வர்.

தங்கள் வேறுபாடுகளைப் பற்றி கவலைப் பட மாட்டார்கள்.

சமாதானமாக வாழ்வதிலேயே குறியாக இருப்பார்கள்.

மனித பலகீனம் காரணமாக சமாதானக் குறைவு ஏற்பட்டு, சண்டைகள் ஏற்பட்டாலும் அதை நீடிக்க விட மாட்டார்கள்.

மனித இனம் பல அடிப்படைகளில் பிரிந்து கிடக்கிறது.

இனம், மொழி, கலாச்சாரம், மதம், வாழும் இடம், அரசியல் போன்ற அநேக அடிப்படைகளில் மனித இனம் பிரிந்து கிடக்கிறது.

இதனால் மக்களிடையே பிரச்சினைகள் ஏற்படுவது இயல்பு.

பிரச்சினைகள் ஒற்றுமையின்மைக்கும், சண்டை சச்சரவுகளுக்கும் காரணமாக இருக்கலாம்.

பிரச்சினைகளுக்கு சமாதானமான முறையில் தீர்வு காண வேண்டும்.

சண்டைகள் ஏற்பட்டால் அவற்றுக்கு பேச்சு வார்த்தைகள் மூலம் தீர்வு காண வேண்டும்.

அவற்றை நீடிக்க விடக்கூடாது.

வாழ்பவர்கள் சமாதானத்தோடு வாழ்ந்து சமாதானத்தோடு மரிக்க வேண்டும்.

மரித்த பின் சமாதானத்தின் தேவன் நமக்கு நித்திய பேரின்ப வாழ்வைப் பரிசாக அளிப்பார்.

நாம் அனைவரும் விண்ணகப் பாதையில் நடந்து கொண்டிருக்கிறோம்.

விண்ணகம் சமாதானத்தின் இருப்பிடம்.

ஆகவே சண்டை போடாமல் நடப்போம்.

சண்டைகள் ஏற்பட்டால் விண்ணக வாயிலுக்குப் போகுமுன் சமாதானம் ஆகி விடுவோம்.

லூர்து செல்வம்.